Greunenkriek tekst & media
Herientreden
As smoandags om ain uur openboare biebeltaik middenien Stad deuren ontgrendelt, stoan der al haile riegen lu te wachten. n Gastvraauw mit n onòfwisboare glimlach op heur snoetje wiest mìnsen derop dat ze heur scooter aan aander kaant weg parkeren mouten, of dat t binnen ‘al vol’ is.
Binnen stoan nait meer ontelboare kaasten vol bouken dij ik mie heugen kin oet mien schoulieren- en studententied. n Enkele òfgeloaden kaast staait der enkeld nog, feng shui positsioneerd achter massa`s toavels mit doaraan apmoal studenten. Biebeltaik zit aan hazzens tou vol. Ain ronde toavel detoneert mit dit patroon en is leeg, as gevolg van n bred: ‘deze tafel is niet bedoeld om aan te studeren’. Terwiel da`k mie de kop brek over wat binnen de bandbredte van ‘studaaiern’ vaalt, vien ik ien ain van dij luttele kaasten oet vrouger tieden t bouk da`k zòcht veur mien onderzuik.
Scanapperoat herkent mien paske nait. “U bent niet bekend in ons systeem, dat is merkwaardig. Hebt u gewoon de contributie betaald?” Vragt juffraauw dij mie helpen komt. Nait bekìnd? Biebeltaik is míe aal bekìnd.
Mien gedachten dwoalen òf noar mien veurege boan, woar mit daank aan vrijwillegers biebeltaik overdag mainsttied open was. Dij vrijwillegers - voak ollu van leerlingen - mouken voak n proatje en haren din ook nog n tip over n bouk of artikel van mien affeer. Sums zo waaineg lezen dat t opsnòrd wer oet spelonken van dörpsbiebeltaiken ien pervinzie, mor as ik n bouk hebben wol din kreeg ik t altied binnen n week aanleverd. “Staait n bouk veur die, Ing, koms t zo eefkes hoalen?” Zee din mien kollegoa van bieb mit n knipoog.
“Hier hebt u niets meer aan hoor, ik knip uw pasje door.” Zegt juffraauw. n ‘Shopoholic’, zo`n wicht dat versloafd is aan nije klaaier kopen, haar nait sneuer wezen kind as heur mannelke geldschaiter (pa of laifke) geldkroan dichtdraaid haar en ain heur creditcard deurknipte. Ik snoef nog eefkes dij weeë geur op van old bouk. Herientreden is eerlieks zo makkelk nait.